วิมติชาโน อธิกโต สํสยํ ปกฺขนฺโต กตมานิ ตานิ ขุทฺทานุขุทฺทกานิ สิกฺขาปทานีติ ฯ
ทุกฺกฏํ มหาราช ขุทฺทกสิกฺขาปทํ ทุพฺภาสิตํ อนุขุทฺทกสิกฺขาปทํ อิมานิ เทฺว ขุทฺ
ทานุขุทฺทกานิ สิกฺขาปทานิ ปุพฺเพหิปิ มหาราช มหานาเคหิ ตตฺถ วิมติ อุปฺปาทิตา
เตหิ เอกํเสน กตา ธมฺมสงฺคีติ ปริยาเยน เม ภควตา โส ปญฺโห อุปทิฏฺโฐติ ฯ
จิรกํ นิกฺขิตฺตํ ภนฺเต นาคเสน ชินรหสฺสํ อชฺเชตรหิ โลเก วิวฏํ ปากฏนฺติ ฯ

ขุทฺทานุขุทฺทกปญฺโห ปฐโม ฯ

ภนฺเต นาคเสน ภาสิตํปิ เจตํ ภควตา นตฺถานนฺท ตถาคตสฺส ธมฺเมสุ
อาจริยมุฏฺฐีติ ปุน เถเรน มาลุงฺกฺยปุตฺเตน ปุจฺฉิโต น พฺยากาสิ เอโส โข ภนฺเต นาคเสน
ปญฺโห ทฺวยโต เอกนฺตนิสฺสิโต ภวิสฺสติ อชานเนน วา คุยฺหกรเณน วา ฯ ยทิ ภนฺเต
นาคเสน ภาสิตํ ภควตา นตฺถิ ตถาคตสฺส ธมฺเมสุ อาจริยมุฏฺฐีติ เตนหิ เถรสฺส
มาลุงฺกฺยปุตฺตสฺส อชานนฺเตน น พฺยากตํ ยทิ เถรสฺส มาลุงฺกฺยปุตฺตสฺส ชานนฺเตน น
พฺยากตํ เตนหิ อตฺถิ ตถาคตสฺส ธมฺเม อาจริยมุฏฺฐิ ฯ อยํ อุภโต โกฏิโก ปญฺโห
ฯ เป ฯ ทิฏฺฐิชาลนฺติ ฯ
ภาสิตํปิ เจตํ มหาราช ภควตา นตฺถานนฺท ตถาคตสฺส ธมฺเมสุ อาจริยมุฏฺฐีติ
อพฺยากโต จ เถเรน มาลุงฺกฺยปุตฺเตน ปุจฺฉิโต ปญฺโห ตญฺจ ปน น อชานเนน
น คุยฺหกรเณน ฯ จตฺตารีมานิ มหาราช ปญฺหสฺส เวยฺยากรณานิ ธมฺมเสนาปตินา
ภาสิตานิ ฯ กตมานิ จตฺตาริ ฯ เอกํสพฺยากรณีโย ปญฺโห วิภชฺชพฺยากรณีโย ปญฺโห
ปฏิปุจฺฉาพฺยากรณีโย ปญฺโห ฐปนีโย ปญฺโหติ ฯ กตโม จ มหาราช เอกํสพฺยากรณีโย
ปญฺโห ฯ รูปํ อนิจฺจนฺติ เอกํสพฺยากรณีโย ปญฺโห ฯ เป ฯ วิญฺญาณํ อนิจฺจนฺติ
เอกํสพฺยากรณีโย ปญฺโห อยํ เอกํสพฺยากรณีโย ปญฺโห ฯ กตโม วิภชฺชพฺยากรณีโย
ปญฺโห ฯ อนิจฺจํ รูปนฺติ วิภชฺชพฺยากรณีโย ปญฺโห ฯ เป ฯ อนิจฺจํ วิญฺญาณนฺติ
วิภชฺชพฺยากรณีโย ปญฺโห อยํ วิภชฺชพฺยากรณีโย ปญฺโห ฯ กตโม ปฏิปุจฺฉาพฺยากรณีโย
ปญฺโห ฯ กินฺนุ โข จกฺขุนา สพฺพํ วิชานาตีติ อยํ อฏิปุจฺฉาพฺยากรณีโย ปญฺโห ฯ
กตโม ฐปนีโย ปญฺโห ฯ สสฺสโต โลโกติ ฐปนีโย ปญฺโห ฯ อสสฺสโต โลโกติ ฯ
อนฺตวา โลโกติ ฯ อนนฺตวา โลโกติ ฯ อนฺตวา จ อนนฺตวา จ โลโกติ ฯ เนวนฺตวา
นานนฺตวา โลโกติ ฯ ตํ ชีว ตํ สรีรนฺติ ฯ อญฺญํ ชีวํ อญฺญํ สรีรนฺติ ฯ โหติ
ตถาคโต ปรมฺมรณาติ ฯ น โหติ ตถาคโต ปรมฺมรณาติ ฯ โหติ จ น จ โหติ